Ор теке

Әр жылғы әңгімелерден 

Теріскейдің ызғырық желі қатарынан пәлен күн қадалып тұрып алатынды шығарды. Биылғыдай қоңыр салқын жайлы жаздың арты бүйтіп аяқ астынан шиырығып кетеді ғой деп кім ойлаған?!

Тірсектерін ызғар тістелеп күнгейге қарай жөңкіліп келе жатқан бір үйір
киік екі жағынан екі дария ағып кеп, бір-біріне құяр тұстағы аша түбек ықтасын ойға
енді еңкейе
бере, едірейіп-едірейіп тоқтай қалысты.

Естерінен шығып кетіпті...

Жылда шілде түсе жол бойындағы шашыранды құмақтарға
малтыға-малтыға әбден қаталап біткен жүріс соқты саяқ үйір осы бір саялы ойға
жеткенде рақаттанып жатушы еді. Тізеден асқанша жүзіп барып, тұнықтан қанып ішіп,
анадай жердегі жалғыз қыраңның күн батыс бөктеріндегі көне молаға кідіріп, бесін
ауғанша көлеңкелеп, тыраңдай аунап-қунайтын. Биыл да олар түстіктен теріскейге
шұбырып келе жатып, әлгі аша түбектің құбыла бетіндегі айқай қара жалдың басына
андыздап шыға келгенді. Сөйтсе... Анадайдан ақсиып «мен мұндалап»
жататын бұлардың суатқа құлайтын үйреншікті сүрлеуі жым-жылас
жоғалған. Жер түбінен оқшау қарауытып тұратын көне мола бір жылдың ішінде осынша көл-көсір боп
өсіп кеткендей дарияға дейін қараң-қараң жалғасып жатыр.

Алыстан аптығып жеткен арда үйір сілейіп тұрды да қалды. Өз көздеріне
өздері сенбей тесіле қарайды. Осының өзі бұлардың бауыр басып кеткен үйреншікті аша
түбектері болса жарар еді... Төңіректі тұтас көмкеріп тұрған ұзыншұбақ жатаған
жалдар сол баяғыша сағымға малынып маңқиып-маңқиып жатыр. Екі жақтан да доға жасап алыстан
орағыта ағып келген екі өзен сол баяғысынша сағымға ұласып жермен-көкті телегей теңіз етіп қалқытып
жіберген. Тек анау теңкиіп-теңкиіп жатқан ығы-жығы қарайғандар ғана көзге
тосын. Тек анау бұлар суатқа құлайтын қасқа сүрлеуді айғыш-ұйқыш тілгілеп тастаған
қара-бұйра жал-жал топырақтар ғана көзге тосын. Бұл екі аяқтыларға не көрінген? Қанша жерден қырық жыл қырғын
аштық келсе де, бүйтіп ата-баба зиратының түбін қорс қып астын үстіне шығарып, аш ішектей шұбалтып, тап
бүйтіп қолдың саласындай бір-бірімен жабыстыра аран қазбайтын еді ғой! Аран
деуге тым тайыз сияқты. Әлде анау ербең-ербең қимылдап жүргендер қабыр қазып
жатқандар ма екен? Бірақ, бүкіл бір түбекті осынша тілгілеп тастайтындай бұл елге тап биыл, тап бұндай төтен індет келмеген
секілді еді ғой. Кеше жолдағы елдің қозы айырып, қой сауып улап-шулап жайбарақат отырғандары
қайда! Ендеше, ата зиратының басынан осынша далитып қабыр қазып бұл немелерді
не қара
басып жүр? Қабырды бүйтіп жер қайысқан қара-құрым жиын боп келіп қазушы ма еді бірақ?
Және осылай аяқ басар жер қалдырмай тілім-тілім қорс-қорс қып қазушы ма еді? Әне
бір бөксесі күнге шағылысып жалт-жұлт етіп шөккен түйедей дөңкигендері немене? Өздері жатыр ма? Тірі
ме? Жоқ, қозғалып бара ма? Не де болса, бұлары бұрын-соңды көре қоймаған құбыжықтар. Не де болса,
бұлары бұрын-соңды біле қоймаған гәп! Бәрінен де мына қолқаңды атып бара жатқан нені айтсайшы.
Егінжайдан түтін көрінбейді. Бірақ жер-көктің бәрін өрт жалап кеткендей. Күңірсіп тұр-ау, күңірсіп тұр,
Бұрын-соңды бұндай иісті білсе не істейсің! Ендеше, сырын білмес істің сыртынан
жүрмеген абзал... Тағы үйір қара жолдың басымен шығысқа бет бұрып, екі өзенді
былайырақтаң жоғарырақтан барып кесіп өтті. Сосын ала жаздай не шыбын, не
бөгелек, не сәйгел кезікпейтін кереметтей самиян жазықта рахаттанып жайылып шықты. Биылғы
жаздың жайлы болғаны сонша, әлгі бір жүрек дірілдетер тосын жәйт естерінен тарс шығып кетіпті.

Жуықта жел теріске аунап, ауадағы ызғар
бірте-бірте
шымырыға түскесін күнгейге бет түзегенде жылда-жылда жүріп қалған үйреншікті
сүрлеулеріне түскен-ді.

Енді, міне, тағы да кеп тығырыққа тіреліп
тұр. Аша түбектен анада көздері шалған жал-жал топырақ қазір бұрынғысынан да
ұлғайған. Қазір кең алқапты ауызы-мұрынынан шыққанша түгел толтырыпты.
Анадай-анадайдан дөңкиіп-дөңкиіп тұратын қара жалдардын ақ селеулі сауырларынан
да саутамтық жоқ. Қамшының таспасындай тілім-тілім. Әр жер-әр жерден дөңкиіп-дөңкиіп тұрған жалтыр
табан темір шоқылары бұрынғыларынан
да үрейлі. Жан-жағына жал-жал топыраққа келіңкіремейтін
әлде бір қалқалармен қоршаған шаршы алаңқайдың
ішіне самсатып киіз үйлер мен делдиме шатырлар тігіліпті. Киіз үй мен шатырлардан да басқа бірдеңелер қарауытады. Ұлы түздің жалба тымақ тұрғындарының ата-бабаларының басына тұрғызатын тас молаларына ұқсайды. Бірақ, олардан гөрі биігірек
сияқты, қабырғасына сығырайтып тесік
қалдырыпты. Төбесіне шошайтып әлдене
шаншып қойыпты. Онысынан бұрқырап
түтін шығып жатыр. Мынау бейтаныс екі аяқтылар
әлгі тас мүсін молаларына бір кіріп, бір шығып тыным табар емес.

Бұларға бірдеңе
көрінген шығар. Мынау ұланғайыр сахараны қанша шарлап жүргендерімен айдаладағы тас моланы түтіндетіп,
паналап отырған екі аяқтыларды ұшырастырып тұрғандары осы. Мынандай сауырыңды шағар ызғырық суықта
бұл жақта ел қалмайтын секілді еді. Мыналар нағып қалып қойған? Бұлардың қора-қора қойлары қайда, үйір-үйір
жылқылары қайда? Мына жол-жөнекей өткен жерлердің ақ оты мен қара отына тіс тимепті. Дін аман
тұр. Сонда мал келмегені ме... Жаңа көшкен жұрттың орыны да байқалмайды. Биылдыққа ел
жоламағаны ма?! Ендеше, мында не бітіріп жүр? Жердің астын тап бұлайша тілгілеп тастағандары қалай? Мынау боз дөңдерді аспан
астын тақ толтыра киік айдап өтсең де, тап бүйтіп қорс қылып кетпес еді-ау? Ендеше мыналардың ел үркітер
бір сиқырлары болғаны ғой. Екі аяқты ел безінгенге мына құбыжықтардан төрт
аяқты бұлар қайтып сескенбесін...

Қара жалдың басына қаптай көтерілген тағы үйірді көріп, қызыл жал
топырақ қоршаудың ішіндегі құжынама қуыстардан екі аяқтылар қаптап өріп шыға келді. Жазда айдалада арқайын жайылып жүрген
бұлармен істері болмап еді. Бұл жолы ауыздарын ашып анталай қарап қапты.
Мына тұрыстары тегін тұрыс дейсің бе? Абырой болғанда, белдеулерінде байлаулы
тұрған аттары көрінбейді. Қастарында құлақтары ербиіп тұрған иттері көрінбейді.
Маңайдағы бұта-бұталардың түбіндегі топырағы
қопсып жатқан ешқайсысы жоқ. Әлгі бір тірсегінен
шап беріп шыбын жанынды шырқыратып көзіңе
әкелетін қанды ауыз темір тұзақтарын құрып тастаған жердің шөбі сиреп, топырағы қопсып тұратын еді...

Бірақ,
бұлардың айласын кім таусып біліп болған? Не де болса мынау жылда соғып,
емін-еркін аунап-қунап қалатын бостан мекендері енді көздерінен бір-бір ұшқалы тұр.

Үйреншікті суат, үйреншікті сүрлеу,
үйреншікті сая мұншалықты ыстық болар ма... Қара жалдың басына қаз-қатар өріп шыға
келген тағы үйірдің ересектеу жағы лақтарын тазы ит қуып жетіп қарнап кеткендей, төл жағы енелері қақпанға
түсіп қалғандай қараптан-қарап көңілдері құлазып тұр.

Алдыңғы жақта, анадайдағы алда
төмпектің басында алшайып оқшау тұрған ор теке шырқ айналдыра қоршап қойған көп молаға
ұқсас үйіктердің бір пұшпағындағы қаққан қазықтай қадалып екі аяқтың көзінің алдынан бірдеңе күнге
шағылысып жарқ-жұрқ ете қалғанда ытқып ата жөнелді.

Қалған үйір де, сол-ақ екен, көш
басшыларының соңынан салып берді. Тағы бір үйір бұл жолы да қара жалды өрнектеп шығысқа
тартты. Далиған ықтасын ойдың шығыс жақ құйрығындағы қабыршақтанып тасы шығып жатқан қырпық жүлгеге
сіңді де кетті.

Пәлен күннен бері мігір көрмей
жөңкіліспен келе жатқан су аяқ үйір осы арада аял жасамақ. Мынау біраздан бері
алашабырланып тұрған аспанның, тірсектерін жалап, сүйектерін шағып бара жатқан
суық ызғардың ойнақтай басқан одыран текеге ұқтырып келе жатқан өз пәрмені бар.

Қалған үйір қарадай қалтырап-дірілдеп,
тек суыт жүріс, жөңкіліспен рана бой жылытып келе жатса, ор текенің шабының арасына
от түсіп кеткендей, бүкіл бауыр түс күйдіріп-жандырып шыдатпай барады. Әлде бір құдірет: «Сол
қызуыңды мынау соңындағы бүрсеңдеген көп тобырға бөліп тарат... Сен салған шоқ
келесі көктемге дейін олардың да бойын балбыратып, алдағы қыстан аман алып шықсын», — дейтіндей. Көкірек
тұсынан сонау жұқа шабына дейінгі екі аралықты тызылдатып алып бара жатқан сол пәледен
тезірек құтылмаса, бірте-бірте буын-буынын діріл алып, қарап тұрып құлап қалар түрі бар. Көзінің алды
қайта-қайта қарауытып кетеді. Бірақ, мынау қарақұрым үйірге екі жылдан бері өзі
ие болып келе
жатқан жас теке ондай шаруаның ызғыған ала дөңде жүзеге аспайтынын, оған да жайлы
мекен, ықтасын керек екеніне қанығып болған. Әдетте ашық аспанды жамылып, айдаланы
төсеніп, емін-еркін түнеп, емін-еркін өріп жүрген тағы үйірдің көсемі мұндай киелі істі аяқ асты құла
дүзге қор қылмайтын-ды. Олар да белгілі бір жерде күйт басып, белгілі бір жерде төл
өргізетін. Бұл үйір де бір кезде сонау күнгей жақтағы сеңгір-сеңгір қара
қошқыл таудың теріскейіндегі көк тасты көп аңғар, көп қолтықтың біреуінде матау алып, жылмиып жатқан сары
барқын жазықтың салқын беліне кеп құралай өргізетін. Одан бері де талай зобалаң өтті. Екі аяқтылар сеңгір-сеңгір
қара қошқыл таудың екі бөктерін де қасқыр тиген қотандай бөрліктіріп бірдеңелерді қазды, бірдеңелерді үйді.
Күнде дүрсіл, күнде тарсыл өлкеге аяқ басу түз тағысына да қауып болмай қалған жоқ. Сөйтіп жүріп осы бір
төрт аяқты шағын жабайы қауым сұр жазықты аяқтай жығылған қалың құмнан әлгі қара қошқыл тау жаққа
беттемей, бірден теріскейге қарай шұбыруға үйренді. Матау алатын да, төл өргізетін де жерлері өзгерді. Мынау
ұланғайыр кеңістікте бұлыңдаған бұлдыр боздың
арасынан сауырын оннан бір, мұннан бір көрсетіп соңына ерткен кәнігі көш басшылары да әбден қартайды, бойынан
әл кеткендіктен бе, жоқ төтен келген ажал ма, алдыңғы жылғы қатты қыста айдаладағы жыланшық өзеннің
бойындағы бір оппа қарға түсіп кетіп, қайта шыға алмай малтығып өлді. Бассыз үйірдің алдына осы бала теке
түсті.

Бала текке балалығын жасады. Былтыр да осы қара суыққа жолда ұрынып,
сонау жыланшық өзеннің бойындағы үйреншікті қара аңғарға жете алмай, жаңағы аш түбектегі жаңғыз
қыранның ығында матау алғанды. Содан өрген төл, қаралай қутыңдап, міне, соңындағы үйірдің ішінде
келеді. Биыл да байқамай ұзақ жайылып қалыпты. Биыл да әлгі ықтасын ойды жер
түбінен аңсап көзі қарауытып зорға жеткен-ді. Өздерінен өздері бұтқа толып кердеңдеп
жүретін екі аяқтылар сенің ұзақ жылда бір келетін күйтіңді қайтсын! Тірілей
жүріп, тас мола салып, тұнық ауаны түтінге бөктіріп тұмандатып отыр. Сол бір жексұрын иіс
танауын желге қанша тосса да, кетпей қойғаны...

Мына бір жақ қапталы жақпар тасты жымысқы жүлгені анада жазда
терістікке бет алып бара жатқанда көзі шалып қалған-ды. Жақпар тастың бір жақ
сілеміндегі қабыршақтанып түсіп жатқан көк тасты көргенде көзі шоқтай жайнап қоя
берген-ді. Бала теке кезінде сонау жыланшық өзеннің бағында кәрі теке жалайтын түяқтың көлеміндей
ғана тығырық көк тасты абайсыз жалап қалып, тұла бойына шоқ түсіп кеткендей тызақтап, жер-көкке сия
алмағаны бар. Сонда байқамай жалап қойған сілекей-сілекей көк тастың қоңырсық исі қолқасын атып кетпей
қойғаны. Қанша жата қалып шөпке аунаса да, танауын желге төсеп, тасырлай шапқыласа да, әлгі бір
әлем-тапрық иіс ыдырамай қойғаны. Бұрын мұндай иісті кәрі текеден ғана байқап,
оның маңайынан жүргенде бір түрлі тұла бойы түршігіп кеткендей болатын. Енді, міне, кәрі
теке үйірдің алдында, бұл үйірдің артында жер түбінде келе жатса да, сол бір әзәзіл иіс аңқиды да тұрады.
Тіпті ара-тұра үйірден бөлініп саяқ кетіп те көрді, әлгі иіс бәрі бір танауын жарып бара
жатады.
Сол бір сұмпайы иістің басқадан емес, өзінен өз бауырынан шығып жүргенін
сонда барып аңғарды. Енді езінен өзі жиіркеніп жұртқа жоламай оқшау жүруге тырысты.
Үйірдің жел жағына шықпай, ыққа қарай ығыса беруге әдеттенді. Бірақ, жұрт бұдан
жиіркенеді ғой десе, кейбір жас тушалар әдейі осылай қарай ойыса жайылғанды жақсы көреді
екен. Бірдеңеден үркіп, бүкіл үйір боп үрпиісе қалған тұста олар бұның бүйіріне
сүйкеніп, бауырына тығыла түседі. Бұдан бұрқырап жүрген бұзақы иістің біреулердің танауларына
майдай жағатынын бұл сонда барып аңғарды. Енді ол иістен өзі де жиіркенбейтінді шығарды.
Қайта мақтан тұтатындай. Енді үйірдің жел жақ бүйірінде ылғи сол жүргені. Әлгі бір сиқыр иіс күннен күнге
күшейе түсті. Күшейген сайын бұл үйірдің
алдындағы кәрі текеге көзі қанталап, едірейе қарайтынды шығарды. Бұрын қасындағы
серіктеріне дұрыстап көз тоқтатпаушы еді. Енді күндіз түгілі түнде жусап жатқанда көз
алдынан қайдағы бір бұлтыңдаған жұмыр жондар мен жылтыраған жылмағай сауырлар кетпей тұрып алатынды
көбейтті. Жас тушалардың көбінің иісін айқын ажыратып алуға жетілді. Бөксесі арбаңдаған кәрі ешкілер
бұған әлі онша үйір емес. Ал ойнақтаған жас тушалар кәрі теке қанша мекіреніп қайырмалағанмен, оған
қарай беттемей, ылғи зып беріп, бұл жүрген жаққа қарай жылысып кетеді.

Құм арасындағы ала қарды қуалай жайылған
тағы үйірдің
жел жақ бетінде келе жатып, жас теке мына қыстан аман шықса, анау тұқайы сыртылдаған
кәрі текенің түбіне жетпей тынбайтынына бірте-бірте сене бастады.

Одан тіпті қыңбайтың қысылмайтын болып
алды. Жел жақтағы бұны көргенде кәрі текені де бір тосын діріл билеп кететіні байқалып
жүр. Бұрынғыдай одыраңдап, ойқастай баспай, үйірдің жел жақ қапталына қайта-қайта жалтақ-жалтақ
қарағыштайтынды шығарыпты. Бұған алаң болам деп жүріп, сүрлеуден адасып қалатынды жиілетті. Суатқа
бірнеше рет бұрын жүріп көрмеген бөтен жақтан құлаймын деп, талай лақты жардан ұшырып
ала жаздады. Талай рет бөрінің жымының үстінен өтіп, қырылып қала жаздады. Қапталдан
қосылған тазыны көрмей қап, бірнеше лақ қанжығада кетті. Әлгі ажалына жетіп тынған
қатты қыста да жел жақтағы бұған ерегесіп, желдей-желдей, сай тұйығындағы жентек қарға түсіп кетіп,
шықпай қалды. Алдарындағы омбы қарға белшесінен батып, бақырып жатқан
көшбасшыларын көріп, тағы үйір кілт тоқтады. Кәрі текенің жан дауысы шығып бақырғанынан
ешқайсысы көмекке шақырғаны деп түсінбей, «мынау ажалды жүнгеге жоламаңдар!» деп ескерткені деп ұқты.
Бәрі де тығырық сайды айналып өтіп, өзеннің ықтасын аңғарына барып құлап, жарқабақ тастың астындағы тар
қуысқа тығылып, бүрсеңдеп тұрып бойларын жылытты. Күртікке батып шыға алмай, қылғына бақырған кәрі
текенің дауысы бәрінің де құлағына жетіп жатты. Бірақ, суықтаң өлімнен қорыққан үйір мынау
төбелерінен өкпеттей төнген жақпар тас қазір жапырыла құлап астында қалса да,
аттап шықпастай боп, дір-дір етіп тұрды да қойды. Кәрі текенің дауысы әлсірей-әлсірей
біржолата семіп тынды. Содан олар боран басылғанша әлгі қоныстан кетпеді. Боран ішін тарта жас қарды жасқана
басып, буы бұрқырап жатқан қара судың бойын бойлап, еріске шыққан үйірдің алдында
одыраңдай басып, жас теке келе жатты.

Көш бастаған көсемдікке де бірте-бірте еті үйренейін деді. Жер басқан төрт
аяқтының көк желкесінен шыққан көп дүсірден сескенбейтіні жоқ. Сескенбейтіндер тек көсемдер ғана. Көк
желкеден шығар дүсір неғұрлым көбейе түскен сайын олардың жандарына майдай жаға
түседі.
Аяқ басқандары алшаңдап, бастары да кекжие түседі. Көсем теке соңына үйір еріп,
алдына матау байланғанда ғана мүйізі қарағайдай боп, аяқ-қолы жуандап, көзінің аласы көбейіп,
айбынданып алады. Оған былтыр күзден бері көзі жетіп жүр. Былтыр күзде соңындағы үйірді манағы аша
түбекке айдап әкеп қамағанда, біразға дейін тілерсегі дірілдеп, өзіне-өзі келе
алмады. Баяғыдағы кәрі текеден көргенін жасап, үйірді шырқ көбелек иіріп, ақыра
мөкіреніп, жерді тарпып-тарпып қалып еді, сақа ешкілер қайқаңдап бір жаққа ойысып,
әлде бір көзге көрінбес құдірет құрып кеткен сиқыр көгенге көгенделіп
қалғандай, тізіліп-тізіліп тұра қалды. Олардың қатарына құйрықтарын шошаңдатып жас
тушалар да барып тұрды. Қыбыр еткен ешқайсысы жоқ. Құла түздің барша дыбысы өше
қалған. Мынау жым-жырт тыныштықты бұзуға өзінен басқа ештеңенің тәуекелі тұрмастай. Тамағын кенеп
мекіреніп қойып еді, кәрі текенің дауысынан гөрі жіңішкерек шықты ма, қалай... Жіңішкелік жүрген
жерде қаншалықты қауқар болады дейсің! Жіңішке дыбыс ― әлжуаздықтың белгісі. Мынау алдында қаз-қатар
тізіліп тұрған көп сауыр мұның шіңкілдеп шыққан жарқыншақ дауысын місе тұтпай, мүсіркеп тұрмасын.
Көзінің алды қарауытып барады. Бар салмақты кеңсірігіне салып, ышқына
мекіренді. Жерді тарпып-тарпып жіберіп, тап алдындағы жоны дір-дір етіп, тағат
таба алмай тұрған жас тушаның сауырына бір-ақ ытқыды. Көзінің алдының қара тұманы
қалыңдап, сүлдері құрып бара жатты. Мына тіршілікке келгелі бүйтіп діңкелеп
көрмепті. Дәрмені сарқылып, қазір үгіліп кетейін деп тұрса да, тап мынандай рахат халді де бұған дейін
көре қоймаған екен.

Содан бұл суытқан
арғымақтай жеңілденіп жүре берді. Бауырына қоламта байлап қойғандай, күйдіріп-жандырып шыдатпай бара
жатқан төтен ыстықтан құтылғасын аяқ қолы жерге тимей сонау ұлы құмдарға құс болып ұшып
жеткендей. Қыс бойы қалың үйірін қызғыштай қорып, бір тыным таппады. Шөпті, желді, иісті айыруға әбден
жетілді. Жер түбінен шыққан иіс әуелі соның танауына, жер түбінен шыққан тықыр
әуелі соның
құлағына жетіп келеді. Сейтіп жүріп өзі де әбден пісіп, сақалы сапсиған сақа текеге
айналды.

Анада көктемде үйірін бастап қара суға енді бас қоя бергенде байқады ― алдында мойыны
жұп-жуан, көзі қып-қызыл, сақалы салбыраған бір бөтен теке тұр. Бұны мұқатқысы келгендей,
тұмсығын шүйіріп керенау көз тастады. Мынау қолтығы сасыған қаңғырма неме қайдан жүр? ― деп жалма-жан
ытқи шегініп, мүйізін оңтайлап беріп еді, үйіріндегі іші бұлтиған шошақай тушалардың біреуінің селтеңдеп
әлгінің қасына барып сүйкене кеткені. Әлдекім бұның да бүйірінен түртіп қалды. Жақтырмай жалт
бұрылып еді ―
әлгі шошақай бөтен текенің емес, өзінің қасында тұр екен. Сөйтсе, судағы сурет ― бөтен теке емес, өзі
екен.

Жаздай ың-шыңсыз жайбарақат жайылып, қазір тіптен күдірейіп
алды. Былтыр күзде бауырына қоламта салып күйек қап байлап қойғандай тызалақтап жүре алмаса, биыл маздаған
қызыл шоқтың өзің салып жібергендей. Мынау жымысқа жүлгеге өртеніп кетпей әзер жетті. Жеткен бойда
алдыңғы аяғымен жерді тарпып-тарпып жіберіп, тұмсығын шүйіріп, мекіреніп қалып еді, кеңсірігі
дар-дар етіп жыртылып кеткендей болды. Жас тушалар тугілі сақа ешкілердің өздерінің сауырлары дір-дір ете
қалысты. Әлгі бір көзге көрінбес жұмбақ көгеннің тағы да құрыла кеткені. Көнбіс үйір тағы да соған байланып
тізіле кеткені. Өн бойын жайлаған өрт енді рық берер емес. Лапылдай түсті. Қазір-ақ былтырғы рахатқа батады.
Мынау тырсиып-тырсиып тұрған семіз ешкілердің күні ертең-ақ тағы да бүйірлері бұлтиып-бұлтиып шыға келеді. Сосын мынау
омырауын өрт боп жалап жатқан дүлей күш сағыммен араласып, самсай шапқылайтын көп
құралайға айналады. Сүйтіп мынау кенересі жоқ көкжиекті шірей теуіп жатқан көлкөсір кеңістік бұның аядай
бауырынан өрбіген төлге толады. Олар көбейген сайын бұның да құдіреті арта түседі. Көз жетер жердегі су аяқ
тағылар мұның тұяғының тысыры мен пысқырғанын бағып, қасы мен қабағын аңдиды. Сонда мынау сауыры
бүлкілдеген көнбіс көп ешкі ғана емес, мынау үшан дала мен үлан аспанның өзі бір
мүныкі боп шыға келмей ме!

Бұл дүниеде бұның
қазіргі істегелі тұрған шаруасынан пәтуалы, одан қасиетті қандай қаракет табылмақ! Көңіліндегі желігін
ғана басып қоймай, алдын ұрпаққа толтыратын бұл шаруадан басқа шаруаның мына дүниеге, мынау ұланғайыр
дала мен жарқыраған аспанға, жайқала өскен шөп пен көлкіп тұрған кәусар ауаға, бәріне жайлы ұя, таусылмас
азық боп келе жатқан жарықтық жаратылысқа қажеті қанша! Жарық дүниенің жалғыз қожалары өздері құсап
әлгі бір екі аяқтылар-ақ бұтқа толады да жүреді. Жуып кетсең ― атын тебініп, қолын ербеңдетіп қуалай
жөнеледі. Дауысы қарлыққанша қи-қулап ит қосады. Құдайдың тегін суаты мен тегін өрісін қимай
қалтарыс-қалтарысқа кек темірден тұзақ құрады. Өздері
бұларға ұқсап ақпейіл жаратылыстың жан қинатпай алдына тосқан азын-ауық
нәпахасына қанағат қып, ешкімге тимей, бөтеннің ырзығына көз алартпай жайбарақат тіршілік
кешіп, жарығың жанған күні дүниеге келіп, жарығың сөнген күні дүниеден кете беруге парасаттары жетпей
жүріп, төрт аяқтылардың бәрінен кемел, бәрінен ақылды жер құдіретпіз деп ойлайды.
Сондағы көрсетіп жатқан кереметтері қайсы? Әлгі бір аша түбектегідей жонын
күнге төсеп жайбарақат жатқан ту жердің қоңына қол салып, таңын ашып, тіршілікті асырап жатқан киелі
топырағын қопарып үстіне шығарып, өскелі-өнгелі тұрған талай шөптің тамырын қырқып, аш ішектей
шұбалтып қиыр-шиыр ор қазғандары ма! Шетсіз-шексіз кең дүниені қолдан тарылтып шырқ айналдыра қалқитып
қоршау тұрғызғандары ма! Әзәзіл екі аяқтылар әлдеқайдан сап ете қалады. Көсеудей бірдеңелерін кезеніп
соңдарынан салып береді. Қасқырдың орнына қасқыр боп тиіп, елден-жерден бездіре қуғандарына
мәз бола ма, қолдарын ербеңдетіп мәре-сәре болады да қалады. Оларының бәрі өзгенің
жарығы мен рахатына жасалған қиянаттан басқа қандай қасиет, тәйірі?! Сонда
олардың арамдықты ақыл, қиянатты құдірет ― деп ұққандары ма! Күшті болса, өз
сіңірлерін созып, жүйрік болса, өз шаптарын жыртпай ма? Біреудің күшін малданып көрген
ол не дәурен?!. Жаратылыстың ғана айтқанын істеп, жұмсағанына жүрмес пе?! Төрт аяқтылар ғана ылғи
сөйтеді ғой... Қазір де, міне, соның пәрменіне мойын ұсынып тұр. Түпсіз
тұңғиықта жатқан бар-жоғы бұған дейін беймәлім боп келген мыңсан жаңа ғұмырдың көшін бастап,
жарығын жандырып бермек. Өзгенің тынышын қашырмайды. Өз төлім, өз үйірім, өз қауымым көбейсін деп
іс қылады. Қара жердің үстіндегі тіршілік думаны бұдан да қыза түссін деп іс қылады. Сосын да мынау құйынмен
жарысқан жүйрік тағылар бет-бетіне безіп кетпей, бұның алдында өз еріктерімен жіпсіз маталып тұр.
Бұның белін ауырлатып бебеулетіп бара жатқан тегеурін қазір осылардың қас-қағым рахатына, ертең дүниеге
келер жас қауым, жаңа ұрпақтың көрер жарығына айналмақшы.

Ор теке жан-жағына орағыта көз тастайды. Маңайында
мынау бітіргелі тұрған киелі шаруасына кедергі келтіретіндей
бейсаубат қимылдап-қыбырлап жүрген-тұрған ештеңе жоқ.

Кең даланы әлдебір әзәзіл иіс жайлап барады. Оны өз бойынан тарап
жатқандай көріп, балқып тұр. Құлағына
әлде бір ызың келгендей. Оны алабұртып тұрған өз жүрегінің дүрсілі деп ұқты.

Көз алдында тағаттары таусылып көл бетіндей дірілдеп көлбей
тізіліп тұрған көп сауырды шолып өтті. Тағы да бір мекіреніп алды. Үні
былтырғыдай емес. Ширақ, әрі қою. Сонда да сақа ешкілерге бас салуға батылы бармай, ойқастап, жас
тушалар жағына шықты.

Жұқа шап тұсынан әлдене лып ете қалды. Алдыңғы екі аяғын
аспандата көтеріп, алға ұмтылды.

Әлгінде ғана ойнақшып бір орында тұра алмай тыпыршып тұрған жас
тушаның жылмағай сауыры үгіліп кетердей боп, бүгіліп барады. Одан сайын құтырынып алған ор теке сусып
түсіп, анадай жердегі жақпар тастың шетіне барып, көк қабыршақ тасты кірш тістеп алатындай, қайзалап-қайзалап
қояды. Жаздай күнге қақталып жатқан көктарғыл тас алабұртып тұрған айғыр хаюанның езуіндегі
бұрқылдақ көбікті жым-жылас сорып алады.

Шабытына мінген дүлей күш шапшытпай тұрғызар емес. Мұндай
дүлей тегеурінге алғаш тап боп тұрған тұмса тушалар қайқиған бөкселері қақырай
сөгіліп бара жатқандай, бүктетіліп сала береді. Ор теке одан сайын желіге түседі. Ауызы
сілекейге толып кетіп, тағы да барып әлгі тарғыл тасқа бас қояды. Өз иісінен өзі еліріп
алған.
Енді сақа ешкілерге тап бергелі тұрып, жан-жағына тағы бір рет көз
жүгіртіп еді ― сол баяғы лүп еткен жел жоқ, тылсым дүние. Тек құлақ тұсында бір
тосын зуыл бар. Еліре шапшыған өз қанының сарыны болса керек.

Масаттанған ор теке сақалын көкке төсеп, шет жақтағы үн-түнсіз
күйсеп тұрған сақа ешкінің дөңкиген биік сауырын көздей атылды. Жылт-жылт еткен
масаты түкке танауын көме түсіп, әлдененің оқыс сырт ете қалғанын байқады.
Сол-ақ екен тып-тыныш тұрған ешкілер құлақтарын түріп елең ете қалысты. Құлақ
шекесін кеміріп
түсердей оқыс күрсіл-тарсыл оғаш дауыс күшейіп барады. Бұрын бұл қанша елірсе
де, тап мынадай боп, маңайында тау құлап жатса да, елең етпестей боп, еліріп көрген жоқ
еді.

Ор теке анадай жерге ытқып түсіп, зеки мекіреніп еді, үйірі қайтадан жым
болысты. Тағы да бір тығыншықтай болып семіріп алған сақа ешкінің жұп-жұмыр сауырын
бауырға енді ала бергенде, бірдеңе сырт ете қалды да, шет жақтағы тушаның
жалп етіп құлап түскенін көзі шалды. Еліріп алған теке сонда да мән бермеді. Жерді тарпып-тарпып жіберіп
тағы атылды. Тағы да бір ешкінің жалп етіп құлап түскенін көрді. Апырай бұған
не болған? Мұның салмағын осынша көтере алмайтындай мына сақа ешкілерге не
көрінген? Бірақ, өн бойын балбырата ерітіп бара жатқан тәтті рахат төңірегінде не болып, не қойып жатқанын жөндеп
аңғаруға мұрша бермеді.

Манадан бері жіпсіз маталып тұрған
момын үйір аяқ астынан
бұрқан-талқан болып, бет-бетіне безе жөнелді. Бұның мекіренгеніне де, бақылдағанына да қарамады.
Бауырындағы ешкі де қаралай дір-дір етіп, әлденеге құлағын қайшылап, тыпыршып бақты. Бұл да одан сайын ерегесіп, езгілей түседі. Сол-ақ екен, әлде бір шоқ әлдеқайдан ұшып кеп, оң санына тыз етіп қадала кеткені. Әлгінде ғана тұла бойын жидіте ерітіп, бауырын қыз-қыз қайнатып тұрған жылмағай сауыр сыр беріп, сусып
алыстай берді.

Тағы үйір әлгі бір әзәзіл шоқтарды шақырған жымысқы жүлгеден ытқып-
ытқып шықты. Боз селеулі құба жазыққа қарай жұлдыздай ақты. Алды-арттарына қарайтын емес. Ор теке
бақылдап дыбыс берді. Оны еститін де, қайырлатын да түрлері көрінбейді. Құлақтарын жымып ап, зытып барады.
Сөйтіп бара жатып та, бірнешеуі жалп-жалп құлап түсті.

Ор теке, қапелімде, не болғанына түсінбей, жер тарпып
көрмекші еді ― оң аяғының қан қақсап қоя бергені. Сонда да шоқырақтап,
үйірінің соңынан салды. Танауындағы бір күңірсік күйік иіс күшейе түсті. Өз исі
екенін, бөгде
иіс екенін айыра алар емес. Басына шапшыған асау қан құлағын тұмшалап ап, құлдырай
ұшып бара жатқан киіктердің қарасын көргенмен, тұяқтарының дүсірін ести алмай
келеді. Жақ жаппай бақылдап келеді. Оған бола қайырылатын үйір жоқ. Бұларға не болған түге? Есіне алдыңғы жылғы қыс
түсті. Омбы қарға батып кетіп, жан ұшыра бақырып жатқан кәрі теке түсті. Сонда да қалың үйірдің еш қайсысы
қайырылмап еді-ау. Оның қасына баруға, өзіміз де қарға батып, әлгінің киген
кебін өзіміз де киерміз деп қорқып еді-ау. Ал бұған неге қайырылмайды? Бұдан
сонша күдер үзетіндей не болып еді? Аяғының қан қақсағанына қарамай, шоқытып
соңдарынан салып келе жатқан жоқ па! Әзір жығыла қоятын түрі көрінбейді. Бұдан
бүйтіп күдер үзгендері қалай? Сонда әлгінде ғана айдағанына көніп келе жатқан тіл алғыш үйірге бұған не тап
болса да, бәрібір болғаны ма? Осы быт-шыт боп кеткендері кеткені ме? Мынау ұланғайыр
дүниеде бұның соңына еріп, бастары бірігіп, ұйтқылы қауым боп келе
жатқанда сол дәурендердің көздерінен бір-бір ұшқаны ма? Жоқ... Былайырақ ұзап
шыққасын аялдап,
арқыраған көш бастар иесін тосатын шығар... Жоқ... Жоқ... Мыналардың тоқтайтын,
тосатын түрлері көрінбейді. Бастан құлақ садаға деп, мына пәледен шыбын жаным қайткенде
аман қалады деп, безіп барады. Шыбын жан алдарындағы көсемдерінен де, қастарындағы қауымдарынан да
қымбат екен? Шыбын жандарын сауғалап, баяғыда талай жыл алдарында жүрген тарлан
басшыларын ажалға тастап, бұның алдында кетпеп пе еді? Бұл жолы да сүйтетін шығар. Бұл жолы бірақ
бастары
біріге қоймас. Тым бытырап кетіпті. Бастары біріккенде де, қапелімде,
алға түсер серкені қайдан табады? Соңдарындағы теке лақтардан көшелі көсем теке
өсіп шыққанша
қай заман?! Оның үстіне тумай жатып қуғын көріп, қос үрей болып ескен су жүрек
немелер үйір бастап қай бір көктете қояды дейсің? Сонда әр қайсысы бас-басына жан бағып
әр текенің сүргінінде кеткені ме?!.

Ор текенің оң саны ғана емес көкірегі де қыз-қыз қайнап келеді.
Апырай, бұл шашырағандары шашыраған ба... Қара жердің
бетінде қаптай жайылып өз төлдерім жүреді ғой деп еді... Оны да көп көргендері
ме! Жақсы үміттің адымы неткен қысқа еді! Неткен қызық, неткен келте дәурен еді!..
Тіпті алдындағы үйірін жаңа бауырына түгелдей қысып шығып та үлгере алмапты... Үлгергендері де аяқ
астынан жалп-жалп тыраң асты. Аман қалғандары да басымен қайғы болып безіп бара
жатып, қай
бір құрсақ тұрақтатып қарқ қылар дейсің! Енді оларға бастарын қосып бір
үйір, бір қауым боп бірге өріп, бірге түнеп жүрер дәурен қайда!

Не де болса, өліспей
беріспейді. Не де болса, кеудесіндегі шыбын жан қашан шырқырап шығып
кеткенше осылай шоқақтай береді. Кім біледі, мынау аяқ астынан тап
болған түсініксіз пәледен көп ұзамай
құтылар. Қара санын
шыжғыра қадалған сұрқия
жара ештеңе етпес. Кеңге бір шықса екен... Жапан түзде не көп, шипа шөп көп...
Соны тауып ап, сүйкеніп, үстіне барып аунап-аунап ақыры жазып алар
еді. Аяғы салбырап көтертпей келеді. Жан дәрмен ілгері тырмыса бермей
болмайды. Осыдан төрт аяғына түгендеп мінер күн туса, ұлы түзде қым-қуыт
тозып кеткен үйірін іздер еді. Ең болмаса, бір жұрнағы табылмас дейсің бе...

Көзінің алдына кіреуке үйіріле береді. Сонда да ышқынып салып келеді.
Неден қашып келе жатқанын, кімнен қашып келе жатқанын өзі де білмейді. Қиқулаған айқай мен тасырлаған ат дүсірі
естілмейді. Орағыта қармайтын әлгі бір қайқы құйрық төрт аяқтының да исі шықпайды. Сонда бұлардың
бұл безгені қай безген? Сонда
бұл көзге көрінбей, төбеден
түскен қандай тажал?

Екі өкпесі алқымына тығылып, тынысы бітіп барады. Қайда қашып келеді, ―
оны да білмейді. Әйтеуір, тоқтағысы жоқ. Сол жақ саны да манағыдай тыз ете қалды. Енді бөксесін сүйрете
алар емес. Еңсесі жерге кетіп барады. Апырай, бұл
неткен тажал. Көзге көрінбей күйдіріп бара жатқан бұл қандай өрт? Көзге көрінбей кірш-кірш
қадалып жатқан бұл қандай азу?

Бір жақ қапталынан манағы бір оқыс дыбыс кенет күшейе шыққандай
болды. Қарауыта түксиген қара жотаның тасасынан сопаң етіп бірдеңе шыға келді. Зулаған жүрісіне қарап, бөрі екен деп қалып еді. Жон арқасында қонжиып
бір екі аяқты отыр. Бәсе, тап мынандай кесепат болар да, оған екі
аяқтылар араласпай жүре ме?! Олар тұрғанда мұндай пәлекет
кімнен келуші еді! Анау мойындарындағы, қолдарындағы салаңдағандары
немене? Сайтан алғырлар, сап етіп қайдан шыға келіп еді. Екі санындағы
егіз жараның әсері ме, жоқ манағы өн
бойын балбыратып бара жатқан сиқыр ләззатты сарқып тауыса
алмағанының әсері ме ― бөксе жағы қараптан қарап батпандай
ауырлап, жерге тартып бара жатыр. Мынау екі аяқты еміншектер жүрген жерде
дүрлікпе, бөрлікпесіз тыныш дәурен бұйырушы ма еді? Осылардың жайбарақат
жайларына жайылып жүрген жабайы үйірдегі шаруалары қанша екен?..
Кең дүниені қарадай тарылтып, қарадай қараң суға алдыртатын да
жүретін бұл неткен кесір
нәсіл еді?!

Дәрмені құрыған ор теке әбден қансырап, тұмсығымен жер сүзе құлады. Топырақ исі сезілгендей болып еді.
Артынан қайта мүңкіп
қоя берді. Өз бауырынан шығатын иіске де келмейді. Басқа бір теке
маңайлап жүр ме екен дейін десе, өртенген мүйіздей күйік иіс... Аспан астын
түгел кернеп алып барады. Қолқасы отқа түскен құрым киіздей қоңырсып жүре
берді.

Шарасынан шыға бадырайған, дымға түсінбеген бейкүнә
қос жанар айнала тосқан тажалдан басқа ештеңе ұсынбаған
жарық жалғанды қимағандай тесірейіп жатыр...

1978 ж.