БҚО-да жастардың инновациялық үздік жобалары анықталды
Дарынды жастарды инновацияны дамыту ісіне тарту мақсатында «Алгоритм» технопаркі» ЖШС-да облыстық білім басқармасының қолдауымен алғаш рет мектеп оқушылары мен студенттер арасында «INNOVA - 2014» байқауы мәреге жетті.
«Алгоритм» технопаркі» ЖШС директоры Арман Есекеновтің айтуынша, аталмыш байқауға барлығы 76 жастан өтініш келіп түскен. Солардың арасынан іріктеп алынғаны - 30 жоба.
Аталмыш шараға 16 мектеп оқушысы мен 14 студент қатысып, өз жобаларын ұсынды. Мысалы, Батыс Қазақстан инженерлік-технологиялық университетінің студенті Ләйлә Амангелдиева Шаған өзенінің сол жақ жағалауын абаттандыруға арналған тиімді жоба (жетекшілері, аталмыш ЖОО-ның оқытушылары Аяжан Масенова мен Жанаргүл Көкенова) ұсынса, облыстық балалар техникалық-шығармашылығы орталығының тәрбиеленушілері Әділ Еркінбеков пен Байдәулет Шаекенов жолды асфальттауға арналған жаңа құрылғының жобасын ойлап тапқан. Сондай-ақ Н. Назарбаев атындағы зияткерлік мектебінің оқушылары Әлішер Санаев пен Гауһар Бүркітбаева баламалы қуат көзінің жаңа жобасы мен суды мұнай қалдықтарынан тазартудың қарапайым әдісін жасап шығарса, Қазталов ауданынан келген Рысбек Аманғали мал көңін пайдалану арқылы қыстақтарды жылытуға болатынын дәлелдеді. Ал қаладағы №38 мектеп-лицейінің оқушысы Эльдар Бақтығалиев «Бақылаушы Айкезбе» жобасы арқылы айдың бетін бақылап отыруға болатынын жеткізді.
Жобаларды таныстыру рәсімінен кейін дарынды жастар «Мектеп оқушылары арасындағы ең үздік инновациялық жоба» және «Студенттер арасындағы ең үздік инновациялық жоба» атты аталымдар бойынша марапатталды. Онда облыс әкімінің орынбасары Марат Кәрімов жеңімпаздар мен жүлдегерлерге дипломдар мен сертификаттар және бағалы сыйлықтар табыс етті.
«Мектеп оқушылары арасындағы ең үздік инновациялық жоба-2014» аталымын Тасқала аудандық мектептен тыс жұмыс орталығының оқушысы Еламан Мертайдың «Генератор мен Эгзоскелет» жобасы жеңіп алды. ІІ және ІІІ орындарды Н.Назарбаев атындағы физика-математика бағытындағы зияткерлік мектебінің оқушылары Әлішер Санаев пен Гауһар Бүркітбаева және Асылбек Бұғыбай өзара бөлісті. Сондай-ақ, студенттер арасында Батыс Қазақстан инженерлік-экономикалық колледжі студенті Максим Табановтың жобасы ең үздік инновациялық жоба ретінде аталса, БҚМУ студенті Тұрсынай Ислямова мен Батыс Қазақстан инженерлік-технологиялық университетінің студенті Шынар Нұрбергеннің жобалары ІІ және ІІІ орындарды иеленді. Бұдан басқа тиімді деп танылған тағы бірнеше жоба авторлары бағалы сыйлықтарға ие болды.
- 116 reads
Жаңа пікірді жазу