Астанада қоқыста жатқан бесік желі қолданушыларының шамына тиді (фото)

Астанадағы ықшам аудандардың бірінде қоқыста жатқан бесіктің фотосын Ұларбек Дәлейұлы есімді желі қолданушысы Facebook-тегі жеке парақшасында жүктеген.

«Мынау қандай тексіздің қылығы екен? Киесі атып кетуден қорықпаса, мынадай сұмдық жасамас еді, əттең! Түсіріп жіберген досым. Лесная поляна 13 үйдің артындағы қоқыс алаңы дейді», - деп жазады Дәлейұлы.

Автордың бұл суретіне пікір білдірген әлеуметтік желі қолданушылары қазақ әрқашанда бесікті қадірлеп, биік қойғанын, ал қазіргі таңда адамдар бесікті қадірлемек түгілі тіпті, баласын бесікке бөлемейтіндердің де бар екенін жарыса жазуда.

Айта кетейік, бесік – сан ғасырлар бойы ұлттың ұясы, қазақы тәлім-тәрбиенің қайнар көзі, бабамыздан қалған киелі мүлік, қой үстіне бозторғай жұмыртқалаған мамыражай тіршіліктің белгісі іспетті. Бесікті қатты қадірлейтіндігі соншалықты, қазақ атасы жатқан бесікке бала, немере, шөбере, шөпшек, тіпті, туажатына дейін бөлейді.

Бесік тек қана қазаққа тән емес, ол Орталық Азия, Қапқаз, Үндістан, Қытай жерін мекендеген көп халықтың ұл мен қызын ұйықтатып, оянғанда қолын шешіп ойнатып, анасының ақ сүтін беріп, тіл-көзден сақтайтын ағаш төсегі. Тек олардың әр халықта жасалу ерекшеліктері түрліше болып келеді. Қазақтар бесікті негізінен қайың, қарағай, талдан иіп жасаған әрі жеңіл келеді.