«ЭЙР АСТАНА» ОҚУҒА ШАҚЫРАДЫ
«Эйр Астана» әуе компаниясы соңғы жылдары кадр тапшылығы мәселесін жергілікті жастарды оқыту арқылы шешуді жоспарлап отыр. Бұқаралық ақпарат құралдарының өкілдерімен кездескен әуе компания басшылары жастарды ұшқыш болуға шақыратын «Арманыңды іске асыр» науқанын бастағанын жариялады.
«2016-2017 жылдары үздік жұмыс берушісі» атанған «Эйр Астана» әуе компаниясы бүгінде қарқынды дамуда. «Эйр Астана» – халықаралық және ішкі бағыттар бойынша 65 рейстерді орындай-тын отандық ірі әуе компаниясы. Қазіргі кезде әуе компаниясындағы қызметкерлердің саны 5000 адамды құрайды, ал авиалайнер паркі 31 заманауи ұшақтан тұрады. Алдағы он жылдың ішінде авиалайнерлердің санын 64-ке жеткізу жоспарлаған. 2020 жылға қарай жұмыс орны 11 пайызға артатын болады. Соған байланысты авиатасымалдаушы компанияға ұшқыштар, инженерлер, механиктер, бортсеріктер және жолаушыларға қызмет көрсету қызметтерін атқаратын агенттер қажет болады.
– Авиацияда пайдалы және табысты компания болып қалуға тұрақты, бірқалыпты өсу ғана көмектеседі, – деп атап өтті «Эйр Астана» АҚ президенті Питер Фостер. – Соңғы 3-4 жылда біздің компания бизнес-үлгісін өзгертіп, жолаушы тасымалдау санын ұлғайту арқылы өзінің табысты компания екендігін дәлелдеді. Біз мұнымен шектеу қоймаймыз, алдағы уақытта жаңа ұшақтардың санын арттырып, штат санын да көбейтпекпіз. Бүгін «Эйр Астана» ұшқыштарды ab-initio бағдарламасы бойынша Испания мен Ирландияда оқытады, бортсеріктерді даярлауды Германия, Ұлыбританияда жүзеге асырады. 2018 жылдан бастап, біз PART-66 стандарты бойынша авиатехниктерді Астанададағы инженерлік-техникалық орталығында дайындай бастаймыз. Осылайша, біз кадр тапшылығы мәселесін шешіп қана қоймай, қазақстандық жасөспірімдер мен қыздарды беделді кәсіпке тартып, өзіміздің әлеуметтік жауапкершілігімізді көрсетеміз.
Бүгінде ұшқыштың оқуын оқып, ірі әуе лайнерлерін басқару – көптеген қазақстандық жастардың арманы. «Эйр Астана» «Арманыңды іске асыр» бағдарламасы бойынша осындай жастарға жол ашып, ұшқыш болуға шақырып отыр. Кандидаттарға ең төменгі талаптар қойылатынын, ең бастысы – адам сену керек, арманына жету үшін бізге келіп өзін сынау керек» деп түсіндіреді әуе компания басшылары.
Қазақстанның ұлттық әуе тасымалдаушысы кадр дайындаумен бірнеше жыл бойы айналысады. Енді бұл процесті жаңа, жоғары деңгейге көтеруді жоспарлап отыр. «Эйр Астана» әуе компаниясы 18-бен 34 жас аралығындағы жастарды «Арманыңды іске асыр» шарасына шақырады.
Авиакомпания үшін бір пилотты оқытып шығару үшін, шамамен, 200 мың доллар жұмсалады екен. Оқуды бітірген ұшқыш жұмысқа тұрғаннан кейін, осы қаржының жартысын ғана компанияға қайтаратын болады. Питер Фостердің айтуынша, кадрларды дайындау жөніндегі бұл бағдарлама – әлемдегі ең пайдалы әрі тиімді. 2009 жылы ab-initio бойынша ұшқыштарды дайындау бағдарламасы басталғалы 189 кадет бітіріп шыққан, олар қазіргі кезде екінші пилот және борт командирі қызметтерін атқарып жүр. Жыл сайын Испаниядағы Херес және Ирландиядағы Корка ұшу орталықтарында 24 кадет оқиды. Келесі жылы кадеттердің саны 40-қа жетеді.
Қазіргі кезде «Эйр Астана» әуе компаниясында 1120 бортсеріктер қызмет етеді, оларға қойылатын басты талаптардың бірі – үш тілде сөйлеу. Келесі жылдан бастап PART–66 авиатехниктерді дайындау бағдарламасы басталады. Бір курста 15 адам болады, оқу 16 айға созылады деп жоспарланған. Оқу – тегін, компанияның есебінен. Курсты бітіргендер «техник-механик» және «техник-авионик» мамандықтарын алып шығады. Олар халықаралық сертификаттар мен лицензиялар алады деп түсіндірді «Эйр Астана» әуе компаниясының қызметкерлерді басқару және әкімшілік мәселелері жөніндегі вице-президенті Евгения Ни.
Қайыржан ТӨРЕЖАН
Жаңа пікірді жазу