Оралдық жүргізушілер тағы газ таппай көше кезіп кетті

Оралдық көлік жүргізушілерінің көгілдір отын таба алмай сабылғанына бір айдан асты. Бұл аймақта тек қолында талоны барлары ғана газдан тарықпайды. Енді сұйық газдың литрін 39 теңгеден 54 теңгеге дейін қымбаттаған. Бұған да жүргізушілер көніп отыр. Бірақ қолма-қол ақшасына сататын ешкім жоқ

Талғат Сүндетқалиев, Орал қаласының тұрғыны:

-Бүгін бермей жатыр. Ақшаға жоқ дейді.

Жанармай бекетіндегілерге жақ ашсаң болды «талон» мен «жоқты» бірге айтады. Ондағылар қазір тек алдын ала шарттасқан мекемелерге ғана қордағы газды құйып жатыр екен. Ал еркін сатылымға көгілдір отынның қашан шығатынын әзірге білмейді. Көлікке құятын көгілдір отын тапшылығын жою үшін энергетика министрлігі газ шығаратын компанияларға тоннасына 11 мыңнан 23 мың теңгеге дейін бағасын көтеруге рұқсат берген еді. Көтерме құнның өсуіне байланысты жанармай бекеттері де қалыспай өз бағаларын ұсынып жатыр. Оралдағы бір компания тіпті бағаны бір жарым есеге қымбаттатуға өтініш білдіріпті.

Клара Әлиева, БҚО табиғи монополияларды реттеу департаменті басшысының орынбасары:

-«Тәуекел» компаниясы 1,6 есеге газ құнын арттырып, сатуға арыз берді. Бірақ біз 38 пайызға ғана өсіруге рұқсат бердік.