«Батыс Қазақстанның ежелгі көшпенділері» атты ғылыми еңбек жарық көрді
Батыс Қазақстан облыстық тарих және археология орталығы жаңа ғылыми еңбек - «Батыс Қазақстанның ежелгі көшпенділері» атты кітапты үш тілде (қазақ, орыс, ағылшын) шығарды.
Аталған монография авторлары - белгілі ғалым, орталық директоры, тарих ғылымдарының докторы Мұрат Сыдықов пен ғылыми қызметкер Яна Лұқпанова.
М.Сыдықовтың сөзіне қарағанда, соңғы жылдары археологиялық қазбаларды зерттеуге ерекше мән беріліп келеді. Қазіргі кезде облыс аумағында он мыңнан аса тарихи-мәдени ескерткіш анықталып, соның 1966-сының төлқұжаты жасалды. Аталған еңбек 2012 жылы Теректі ауданының Долин ауылы маңындағы Тақсай I кешеніндегі №6 обадан табылған жәдігерлерді зерттеу нәтижелері негізінде жазылды.
Жалпы, Орал өңірінде ұзақ жылдар бойы жүргізілген археологиялық зерттеулер бұл аймақты мекендеген халықтың сонау ерте темір дәуірінде-ақ қайталанбас мәдениет қалыптастырғандығын көрсетіп отыр. Батысында скифтермен және савроматтармен, оңтүстігінде сақтармен, солтүстігінде және шығысында отырықшы
орманды дала халықтарымен шекаралас қоныстанып, туыстық және тілдік жақындықта болған Орал өңірі номадтары Балқаннан Солтүстік Қытайға дейінгі ұланғайыр алапты алып жатқан Еуразия кеңістігінде жаңа технологиялар мен мәдениеттің таралуына зор ықпал етті. Осы жағынан алғанда, бұл монографиялық еңбек тарихымызды түгендеп, зерделеуге қосылған сүбелі үлес болмақ.
Сонымен қатар Тақсай I оба кешенінен табылған жәдігерлер негізінде жасақталған «Алтын ханшайым» және «Тақсай тарағы» атты екі буклет те жарыққа шықты.
- 111 reads
Жаңа пікірді жазу