БҚО: денсаулық сақтау мекемелеріне 60 автокөлік табыс етілді
Облыс әкімі Нұрлан Ноғаев өңірдегі медицина мекемелеріне жалпы құны 176,660 млн. теңге тұратын, қазіргі заманғы құрал-жабдықтармен жарақтандырылған 60 автокөліктің кілтін табыс етті.
Өңір басшысының атап өткеніндей, Елбасы Н. Назарбаевтың медициналық көмек сапасын жақсарту, халықтың денсаулығын нығайту жөніндегі тапсырмаларына сәйкес облыстағы денсаулық сақтау мекемелерінің материалдық-техникасы базасы күннен-күнге нығайып келеді. «Саламатты Қазақстан» бағдарламасы бойынша адам өмірін ұзартуға септігі тиетін жаңа ауруханалар салынуда. Дәрі-дәрмекпен қамту, маман дайындау жақсы жолға қойылды. Облыста заманға сай, жаңа құрал-жабдықтардың арқасында бұрын мүмкін болмаған өте күрделі оталар жасалуда. Өткен жылы 15 дәрігер Оңтүстік Кореяда, Израильда біліктілігін арттырса, биыл 5 дәрігер шетелде дәріс алуда. Мұндай шаралар алдағы уақытта да жалғасын табады.
Жаңа көлікке қолы жеткен мекемелер ішінде 12 аудандық аурухана (бұлардың кейбірі бір емес, екі көлікке бірден қол жеткізді), Оралдағы №1, 2, 3, 4, 5, 6 емханалар, облыстық туберкулезге қарсы диспансер, «Орал» туберкулез шипажайы, облыстық көп бейінді балалар ауруханасы және «Жедел жәрдем» стансасы бар. Жедел және кезек күттірмейтін медициналық көмекті жаңарту бағытында 2011 жылы «Жедел жәрдем» стансасына «УАЗ» маркалы 14 санитарлық көлік, 2012 жылы «Hyndai» маркалы 7 реанимобиль, 2013 жылы «ГАЗель» маркалы 9 реанимобиль берілген болатын. 2009-2010 жылдары жедел жәрдем қызметін жетілдіру мақсатында бұл стансаға автоматтандырылған басқару жүйесі (АБЖ) және «АДИС» бағдарлама кешені қойылды. АБЖ жүйесі бүгінде барлық қалалық емханаларға және Ақсай, Теректі, Тасқала аудандық ауруханаларына орнатылған. 2010 жылы тұрғындарға аумақтық қызмет көрсету үшін қалалық емханаларға кезек күттірмейтін көмек бригадалары енгізілді. Осы бағытта қаладағы халқы тығыз орналасқан Зашаған ауданының №6 емханасы қарамағындағы Круглоозерный және Теректі ауданының Подстепный ауылдық дәрігерлік амбулаториялары да жаңа көлікке ие болды.
- 106 reads
- Русский
Жаңа пікірді жазу