Мемлекеттік қызметкерлер мүгедектер арбасына отырып, қала аралады

29 сәуір күні Орал қаласында мемлекеттік қызметкерлер мүгедектер арбасына отырып, түрлі әлеуметтік нысандарды аралады.

Бұған Мәжіліс төрағасының орынбасары Дариға Назарбаеваның шенеуніктер мүгедектер арбасына отырып, олардың қалай тұрмыс кешетіндерін өз бастарынан өткізіп көру керектігі туралы сөзі қамшы болды.

Бұқаралық ақпарат құралдарының өкілдері де қатысқан сапар барысында тірек-қимыл жүйесі бұзылған мүгедектердің «Арба» қоғамдық бірлестігінің төрайымы Гүлмира Батпақұлованың атап өткеніндей, соңғы кезде мүгедектерді қолдау бағытында қоғамда оң бетбұрыс бар. Мәселен, қазір бірде-бір нысан пандуссыз пайдалануға берілмейді. Бірақ кейде олар талапқа сай келмегендіктен, мүгедектер онымен жүре алмайды. Көп үйлерде лифт жұмыс жасамайды. Осының бәрі мүгедектердің толыққанды өмір сүруіне кедергі келтіреді. Көпшіліктің назарын аудару үшін осындай шараларды өткізіп тұрудың артықтығы жоқ. Ең бастысы, мүмкіндігі шектеулі адамдарға барынша жағдай жасау бағытында Елбасы қойып отырған міндеттерді орындаудың маңызы зор.