Оралда Достық үйі бой көтереді
Оралда Достық үйі бой көтеріп, ұлтаралық келісім нығая түсетін болады. Бұл туралы Қазақстан халқы БҚО ассамблеясы төрағасының орынбасары, хатшылық басшысы Ғайса Қапақов мәлім етті.
Оның айтуынша, Достық үйінің құрылысы биыл басталмақ. Қазіргі уақытта Достық үйі тұжырымдамасының жобасы жасалды. Ол Үкіметтің қаулысымен бекітілуі тиіс. Осы жобаға сәйкес Достық үйі тікелей облыс әкімдігіне бағынатын болады. Қаржыландыру жөніндегі бірқатар мәселелер осы тұжырымдама бекітілгеннен кейін шешілуі тиіс. Достық үйінің жұмысын үйлестіру бағытында мемлекеттік мекеме құру көзделіп отыр. Күні бүгін Достық үйінің үлгі жобасы өңірдің ерекшеліктеріне сәйкес түзетіліп, ғимарат қаланың жаңа орталығында салынған Салтанат сарайының қасында орналасатын болады. Бұл сән-салтанаты келіскен сарайлар мәнеріндегі сәулет өнерінің қайталанбас ансамблін қалыптастыруға мүмкіндік береді.
Достық үйінің аумағы 4,5 мың шаршы метр болады. Бұл ғимаратта ауқымды мәжіліс залы, би залы, конференц-залы болады деп жоспарлануда. Сонымен қатар оқу кабинеттері, дыбыс жазу студиясы болады. Бір сөзбен айтқанда, Достық үйінде танымдық-тағылымдық сипаттағы әр түрлі мәдени-ағарту шараларын өткізу үшін барлық жағдай қарастырылған.
Жалпы, облыстық ассамблея құрамында халық шаруашылығының әр түрлі саласында жемісті еңбек етіп жүрген елге танымал 117 отандасымыз, оған қоса 22 адамнан тұратын облыстық ассамблея кеңесі және бар. Сол сияқты ассамблея жанынан құрылған ақсақалдар кеңесі, аналар кеңесі, ғылыми-сараптамалық кеңес, қоғаммен байланыс жөніндегі кеңес және ассамблеяның жастар қанаты жұмыс істейді. Осы құрылымдарға қоса облыс аумағында бүгінгі таңда 33 этномәдени бірлестік Жайық жұртының ынтымағын нығайтып, ырысын молайтуға ұдайы мүдделілік танытып, жұмыс істеуде. Қазіргі кезде әрбір ауданда аудан әкімдігінің басқаруымен ассамблея кеңестері құрылды. Сонымен қатар 160-тан аса қоғамдық келісім кеңесі құрылып, ассамблея жұмысына жаңадан 1800-ден астам белсенді азамат тартылуда. Және бір атап өтер жайт, мектептерде, жоғары және арнаулы орта оқу орындарында достық клубтары құрылып, бұл бағыттағы жұмыстарға қазірдің өзінде 4 мыңнан астам қыз-жігіт жұмылдырылды.
Тіл - ассамблеяның күн тәртібінде тұрған басты мәселелердің бірі. Қазақ тілінде еркін сөйлейтін өзге ұлт өкілдері Ақ Жайықта да баршылық. Мысалы, мемлекеттік тілде әдеби шығарма жазатын отандасымыз, шешен халқының өкілі Мұқтар Боқаев жүрген жерінде өз ұлтының қазақ халқынан көрген жақсылығын жыр қылып айтудан жалыққан емес. Ұлы Абайдың тілінде сөйлеймін деп ұмтылып жүрген азаматтардың бірі - жергілікті татар мәдени орталығының төрағасы Ришат Хайруллин, қазақ тілін үйренуге ынта-ықыласы ерекше отандасымыздың бірі - «Вайнах» шешен-ингуш этнобірлестігінің төрағасы Данильбек Саратов. Мемлекеттік тілге құрмет жөнінен облыстық ассамблеяның жастар қанатының жетекшісі Игорь Спиридонов - замандастарына өнеге болып жүрген жастардың бірі. Қазақ тілінде жатық сөйлейтін азаматтардың бірі - әзербайжан этномәдени ұйымының төрағасы Наджаф Мамедов, украин этномәдени ұйымының мүшесі Ирина Жилик, белорус этномәдени ұйымының мүшесі Ольга Рапацкая. Қазақ тіліне құрмет арта түскендігінің және бір жарқын дәлелі - «КазАрмаПром» акционерлік қоғамының бас директоры Станислав Качалоның отбасы. Осы азаматтың бес перзенті де қазақ мектептеріне барып, сапалы білімге қоса, саналы тәрбие алып жүрген өрендер. Жақын арада Станислав Павловичтің бір ұлы Алматы қаласында өткен республикалық домбырашылар конкурсында көптеген қаракөз құрбы-құрдасының алды болып, бірінші орынды иеленіп, Оралға мерейі өсіп оралды.
«Қазақстан халқы Ассамблеясының ХХ сессиясында Елбасымыз ассамблеяның басты міндеті - қоғамдық келісім деп атап көрсеткен еді. Ал ұлтаралық қатынас сан қырлы жұмыстың бір бөлігі екені белгілі. Ассамблеяның таяудағы сессиясында да алда тұрған мақсат-міндеттерді кеңінен талқылайтын боламыз. Елдегі береке-бірлікті, тыныштық пен келісімді сақтап, нығайта білу - басты міндет. Осы орайда Достық үйі сынды сән-салтанаты келіскен ғимараттардың ашылуы іске тың серпін беретін болады», - деді Ғ.Қапақов.
- 113 reads
Жаңа пікірді жазу