Бір жар іздеп

(Әлішер
Науаидан)

Бір жар іздеп
шартарапты шарласам да таппадым,

Қайғы жұтып, қара
тұтып зарласам да таппадым.

Ғазиз басты, қыршын
жасты құрбан қылып жолына,

Өзі қысқа
ғұмырымды арнасам да таппадым.

Уа, құдірет,
іздегенім жер бетінде болмады-ау,

Әуреленіп
өзімді-өзім алдасам да таппадым.

Періште ме әлде
менің аңсағаным пенде емес,

Қиял қуып, көкке
шығып, самғасам да таппадым.

Көңіл көзі құпияңды
жариялап іштегі,

Сорлы жүрек,
кияметті таңдасаң
да таппадым.

Шарапаты тимеген
соң күдер үзіп мешіттен,

Шараптың
көл-дәриясын жалдасам да таппадым.

Қайран, Науаи, тәркі
дүние құлы болдың сол үшін,

Бұл пәниден бір
сабақ жіп алмасам да таппадым.