"Жаман қатын" қалай жүр маңайыңда?
Күпі киіп, керзі етік жаз айында?
Бір кездегі сұлуды сылаң қаққан,
Күте алмаған өзіңнің сазайың да!
Жүрісін-ай, баса алмай ылбыраған...
Жұмысын-ай, жүн түтіп, қыл бұраған...
...Қайран құрдас, сұлу қыз, күміс көмей,
Едің бір кез атанған "бұлбұл адам".
...Жасамапты жұмысын өкіметтің...
Отын жаққан ұл-қызға көкіректің...
...Өсіргені шын ба екен он бес бала!..
...Онда біздер біріміз жетімектің.
Жап-жас болып бұл күнде ел енесі,
Шалқып жатыр көрінбей кенересі.
Рас па екен дегені көршілердің:
"Отыз шақты боп қалды немересі".
Ғалым екен бір ұлы елден асқан,
Күйеу қанша, ұл қанша тең, жарасқан!
Ұшқышы да, қойшысы өз үйінде,
Бас иеді өзіне Жер мен Аспан!
Жарымай-ақ қойса да баспанаға,
Басқа жаннан бақыты асқан ана!
Сыңғырлайды күлкісі құлақ тербеп,
Лайықты дыбыспен жасқа ғана.
- 111 просмотров