Қамыстың басында шөп шауып жүргенбіз. Пішеншілер қосында үш
ер адам. Түске таман ферма меңгерушісі Шәкер аға келді. Өңі өрт сөндіргендей қап-қара
болып түтігіп кетіпті.
- Ахметжанның баласы қайтыс болыпты.
- Не дейді, оныншы класта оқитын Мұқаны ма?
- Иә.
Жүрегіміз суылдап қоя берді. Мұқан біртоға, жуас бала-тұғын.
Бізден ересек. Ауыл балалары футбол ойнағанда, Мұқандай футболшы табыла
бермейтін. Сол Мұқан...
Сенгіміз келмейді. Үлкендер жағы жинала бастады. Біз болсақ,
үрпиісіп тұрмыз.
- Сендер неғып тұрсыңдар?- деді Шәкер аға зекіп.-
Бір-бір атқа мініп
алып, бізбен бірге
жүріңдер, азамат емеспісіңдер!
Он бес шақырым
жердегі ауылдың шетіне
іліккенде, ферма меңгерушісі ат тізгінін тартып, кейіндеп келе жатқан бізді
күтіп алды.
- Қыршын кеткен жас қой. Қазір ат қойып, айғайлап барамыз.
Топырақты өлімнің де өзіндік салт-дәстүрі бар. Ал, кәне, жүрек тоқтатып,
буындарыңды бекітіңдер.
Үлкендер аттарын тебініп алға түсті.
- Ой, бауыре-ем!
- Ой, құлыне-ем!
Қаралы ауыл күңіреніп кетті. Тұяқ дүбірі, жүрек дүрсілі...
«Мұқан! Мұқан!»-деп өксігендей. Арсыз ажалдың қанды шеңгеліне кеткен жас ғұмырды
жоқтаған тірілердің көз жасының ішінен аспан мен жер, тау мен дала, үйлер мен
адамдар басқаша, мүлдем басқаша болып көрінеді екен!..
- 106 просмотров