Туған жердің қия алмай ой мен белін,
Құс керуені аспанға ойды өрнегін...
Сусылдайды қанаттар сөйлете алмай,
Сағыныштың тілі жоқ сөйлемдерін.
Сенем, сенем құстардың еліне мен,
Қанаттылар... түсінем, тебіренем;
Өмір
ұя салған бұл сары дала -
оңайлықпен ұмытылмас қоңыр өлең.
Коңыр өлең кімді де шыдатқандай,
Кұс екеш құс жүрегін жылатқандай.
Жердің мың-мың тамыры бүлкілдейді,
Бүйірі тоқ, бұлтиған бұлақтардай.
Шидің басын шулатқан мынандай жыр,
Табаны - тоң төбеге қиялдай бір...
Қара шелек жаңбыры қарашаның,
Айналсоқтап қаладан шыға алмай жүр.
Ертелі-кеш қурайды ермек көріп,
Өзегіне жел кірер түйдектеліп.
Қырда құйын жыртады...
Тоғай жақтан
Жаздың жапырақ шапанын сүйреп келіп.
Іңір түссе жарысқан мың-мың оттай
Түндер ояу жүреді тыным таппай.
Тың даланың төсінде бір алып бар, -
Мырқымбайдың баласы Миллиардбай!
Қиыршық қар, ақ жаңбыр арасында.
Бидайменен біз өстік... нанасың ба?
Картада жоқ бесінші - Алтын Мұхит
Толқып жатыр қазақтың даласында.
Шуылында мұхиттың қайсарлы ән бар,
Мұнда келмес қиыннан тайсалғандар.
Шарт буынған белбеуі тоқшылықтың -
Ми батпағы езілген лайсаң жолдар...
Елші бұлттар алып кеп қыстың кәрін,
Бауырынан үзді қар ұшқындарын.
Мәкең берік ұстайды ұлы кеме -
Қазақстан күзінің штурвалын.
Арқасында ақ жолақ бояуы бар,
Сары аңызбен қашады қоян қырлар.
Көк ала бұлт күркіреп керней тартты,
Таулар,
белдер,
ой,
жазық,
ояныңдар!
- 524 просмотра