Шөптерге мөлдір шық тұнып,
Сүмбіле сырын ұқты
жұрт...
Шашылған сәтте ақ моншақ,
Өрмелеп шыңға шықты бұлт!
Жатпады ол Жерден хал сұрап,
Қаһарға мінді қамшыны ап!..
Сілтеген кезде...
Өзінің -
Көз жасы кетті тамшылап...
Айналды арты жаңбырға,
Ойласаң, бір гәп бар мұнда!
Көңілді қалдыр, қалдырма,
Өкпелеу бекер тағдырға!..
Айналды жаңбыр несерге,
Жаумаса бұлт - көшер ме?!
Жер-Ана жонын төсер ме? -
Жауыздық тілеп - осы елге!
Айналды нөсер - тасқынға,
Тасқынға Жерді бастырма?!
Жан бітіп еді тас-құмға,
Жер үйлер қалды астында!..
Сел жүріп, естен тандырды,
Босқан жұрт таңға қаңғырды.
Ендеше: "Жаусын!"...
"Жаусын!" - деп,
Тілейміз неге жаңбырды!?
Оғаш па жаңбыр тілеген?
Ыстыққа күйіп, жүдеген, -
Адамдар...
Жауын астында...
Риздық барын біле ме?!
Білмесе, көрсін жол шығып,
(Өсіп тұр жолда - он шыбық!)
Толассыз жаңбыр - береке!..
Тоқтамай жауса - молшылық!
Егін де шығар жайқалып,
Әйтседе, бірақ байқа, жұрт!
Табиғат кейде бергенін, -
Алады кері қайтарып!..
Болғанша оған - өкпелі,
Тәңірге табын Көктегі.
Өмірде бәрі - өлшеулі,
Есесіз нәрсе жоқ, тегі?!
- 139 просмотров