Аққайың тұр - белі аздап құрысқан,
(Шошынғандай оқыс шыққан дыбыстан).
Күйінгеннен болды ма екен бұл түрі,
Біреулердің қырсығынан - жұғысқан?!
Аққайың тұр - бөксе жағы бүгілген,
(Ару сынды - тірлігінен түңілген).
Өкінішпен өксіп жылап тұр ма екен:
"Қорқады-ау, -деп, көрген адам
түрімнен".
Аққайың тұр - кеуде тұсы иілген,
Өңі - сынық, қас-қабағы түйілген.
Сырт пішіні салақ қызға ұқсайды,
Салғырт қарап, қалай-солай киінген.
Аққайың тұр - айдалада жалаңаш,
(Ару сынды ақшасы жоқ, тамағы аш).
Бұл да өмірдің болар, бәлкім өз заңы,
Ендеше оны айыптау да жарамас?!
Тағдыр заңы солай болса, сөкпеңдер,
Қайыңдар да бүр жарады - көктемде!
Сол үшін де ұқсатамын - қазақтың
Қыздарына - әрлі-берлі өткенде...
Сөз еттім мен келгеннен
соң ұтыры,
Қайың түрі неге мұнша - жұпыны?!
Ақын жазған "Ақбалтырлы қайыңдар"
Жүрмес пе еді ойнақ салып, құтырып!
Ойлап кейде осыларды - көз ілем,
Заман ғой бұл - алысқан өз-өзімен.
Көше кезіп жүрген
қазақ қыздарын
Нақ осынау қайың сынды сезінем!..
- 219 просмотров